రాకా.. ఆ నలుగురు ఎందుకు?

ఐకాన్ స్టార్ అల్లు అర్జున్, స్టార్ డైరెక్టర్ అట్లీ కాంబినేషన్ లో రూపొందుతున్న ‘రాకా’ చిత్రం అనౌన్స్‌మెంట్ తోనే సెన్సేషన్ క్రియేట్ చేసింది. సుమారు 900 కోట్ల భారీ బడ్జెట్ తో సన్ పిక్చర్స్ నిర్మిస్తున్న ఈ సినిమాపై ఇండస్ట్రీలో రకరకాల చర్చలు నడుస్తున్నాయి. సైన్స్ ఫిక్షన్ యాక్షన్ జోనర్ లో తెరకెక్కుతున్న ఈ సినిమాలో బన్నీ లుక్ ఇప్పటికే సోషల్ మీడియాను ఊపేస్తోంది. అయితే, ఈ ప్రాజెక్ట్ లో కేవలం యాక్షన్ మాత్రమే కాదు, గ్లామర్ పరంగా కూడా అట్లీ ఒక భారీ ప్లాన్ సిద్ధం చేసినట్లు సమాచారం అందుతోంది.

కథ డిమాండ్ మేరకు నలుగురు క్రేజీ హీరోయిన్లను ఈ సినిమాలో భాగం చేస్తున్నట్లు తెలుస్తోంది. ఈ చిత్రంలో ప్రధాన కథానాయికగా దీపికా పదుకొణె నటిస్తుండగా, ఆమెతో పాటు జాన్వీ కపూర్, రష్మిక మందన్న, మృణాల్ ఠాకూర్ కూడా కీలక పాత్రల్లో కనిపించబోతున్నారు. ఒకే సినిమాలో ఇంతమంది స్టార్ హీరోయిన్లు ఉండటం అంటే అది మామూలు విషయం కాదు. అట్లీ గత చిత్రాలను గమనిస్తే, ఆయన కథలో ప్రతి పాత్రకూ ఒక ప్రత్యేకత ఉంటుంది.

‘రాకా’లో కూడా ఈ నలుగురు భామలకు కథా పరంగా సమానమైన ప్రాధాన్యత ఉంటుందని చిత్ర వర్గాలు చెబుతున్నాయి. ఇది కేవలం గ్లామర్ కోసమే కాకుండా, కథలో వచ్చే కీలక మలుపులకు వీరి పాత్రలు ఆధారంగా ఉంటాయని సమాచారం. దీపికా పదుకొణె ఈ సినిమా కోసం సుమారు 25 కోట్ల భారీ పారితోషికం తీసుకుంటున్నట్లు తెలుస్తోంది. ఆమె పాత్ర యాక్షన్ ఓరియెంటెడ్ గా ఉంటుందని ప్రచారం జరుగుతుండగా, మిగిలిన ముగ్గురు హీరోయిన్ల రోల్స్ ఎలా ఉండబోతున్నాయనేది ఇప్పుడు ఆసక్తికరంగా మారింది.

జాన్వీ కపూర్ ఇప్పటికే తెలుగులో వరుస ప్రాజెక్టులతో బిజీగా ఉండగా, రష్మికకు అల్లు అర్జున్ తో ఉన్న కెమిస్ట్రీ ‘పుష్ప’ ద్వారా అందరికీ తెలిసిందే. ఇక మృణాల్ ఠాకూర్ తన క్లాస్ ఇమేజ్ తో ఈ భారీ యాక్షన్ డ్రామాలో ఎలాంటి ఇంపాక్ట్ క్రియేట్ చేస్తుందో చూడాలి. నలుగురు హీరోయిన్ల మధ్య సీన్లు చాలా ఇంటెన్స్ గా ఉంటాయని టాక్.

సాధారణంగా ఒక సినిమాలో ఇద్దరు హీరోయిన్లు ఉన్నా పారితోషికాలు, డేట్స్ సర్దుబాటు చేయడం నిర్మాతలకు పెద్ద సవాలుగా మారుతుంది. కానీ సన్ పిక్చర్స్ వంటి బడా సంస్థ కావడం, అట్లీకి ఉన్న మేకింగ్ స్టైల్ వల్ల ఇంతమంది స్టార్లను ఒకే తాటిపైకి తీసుకురావడం సాధ్యమైంది. అల్లు అర్జున్ క్రేజ్ ను పాన్ ఇండియా లెవల్లో నెక్స్ట్ లెవల్ కి తీసుకెళ్లడానికి ఈ నలుగురు హీరోయిన్ల ఎంపిక ఒక మాస్టర్ స్ట్రోక్ అని చెప్పొచ్చు. కథలో ఒక్కో హీరోయిన్ ఒక్కో కాలక్రమంలో లేదా ఒక్కో విభిన్నమైన లొకేషన్ లో కనిపిస్తారని ఒక టాక్ కూడా వినిపిస్తోంది. ఏదేమైనా ‘రాకా’ కేవలం అల్లు అర్జున్ బీస్ట్ మోడ్ మాత్రమే కాదు, నలుగురు స్టార్ హీరోయిన్ల గ్లామర్ బజ్ కూడా అని అర్థమవుతోంది. షూటింగ్ పనులు వేగంగా జరుగుతున్న ఈ చిత్రం బాక్సాఫీస్ వద్ద ఎలాంటి హడావుడి సృష్టిస్తుందో చూడాలి.