'ప్రసన్నవదనం'.. సుహాస్ బాక్సాఫీస్ టార్గెట్ ఎంత?

ప్రస్తుతం టాలీవుడ్ లో నేచురల్ యాక్టింగ్ తో దూసుకుపోతున్న యువ హీరో సుహాస్. కమెడియన్ గా కెరియర్ స్టార్ట్ చేసిన సుహాస్ కి కలర్ ఫోటో మూవీ హీరోగా బ్రేక్ ఇచ్చింది. అందులో కన్నీళ్లు పెట్టించే పెర్ఫార్మెన్స్ తో ఆకట్టుకున్నాడు. ఆ మూవీ తర్వాత కూడా క్యారెక్టర్ ఆర్టిస్ట్ గా పలు సినిమాలలో నటించాడు. గత ఏడాది రైటర్ పద్మభూషణ్ సినిమాతో సుహాస్ హీరోగా మరో హిట్ ఖాతాలో వేసుకున్నాడు.

ఈ సినిమా తర్వాత అంబాజీపేట మ్యారేజ్ బ్యాండ్ మూవీతో డీసెంట్ హిట్ సొంతం చేసుకున్నాడు. ఇది విలేజ్ బ్యాక్ డ్రాప్ లో లవ్ అండ్ కామెడీ జోనర్ లో వచ్చి సక్సెస్ అందుకుంది. ఈ ఏడాది శ్రీరంగ నీతులు అనే మూవీతో ప్రేక్షకుల ముందుకి వచ్చాడు. ఈ సినిమాకి పర్వాలేదనే టాక్ వచ్చింది. అయితే కమర్షియల్ సక్సెస్ అందుకోలేదు. అంథాలజీ స్టోరీస్ తో శ్రీరంగ నీతులు తెరకెక్కింది. సోలో హీరోగా ప్రస్తుతం ప్రసన్నవదనం అనే మూవీ రిలీజ్ కి సిద్ధం అవుతోంది.

మే3న ఈ సినిమాని గ్రాండ్ గా రిలీజ్ చేస్తున్నారు. రీసెంట్ గా ప్రేక్షకుల ముందుకొచ్చిన ట్రైలర్ కి పాజిటివ్ రెస్పాన్స్ వచ్చింది. కామెడీ అండ్ థ్రిల్లర్ జోనర్ లో ప్రసన్నవదనం మూవీ ఉండబోతోందని తెలుస్తోంది. ఫేస్ బ్లైండ్ ఉండే యువకుడు ఓ హత్యానేరంలో సాక్షిగా మారి హంతకులని ఎలా పట్టించాడు అనేది ఈ మూవీ కథాంశం అని ట్రైలర్ బట్టి తెలుస్తోంది. ఇలాంటి కథలకి ఈ మధ్యకాలంలో ఆదరణ పెరిగిన నేపథ్యంలో ప్రసన్నవదనం మూవీ కూడా క్లిక్ అవుతుందని భావిస్తున్నారు.

అర్జున్ వైకె ఈ సినిమాతో దర్శకుడిగా పరిచయం అవుతున్నాడు. ఈ సినిమా మీద పాజిటివ్ వైబ్ ఉన్న నేపథ్యంలో హ్యాట్రిక్ హిట్ ని సుహాస్ తన ఖాతాలో వేసుకుంటాడనే మాట వినిపిస్తోంది. ఈ సినిమా నాన్ థీయాట్రికల్ రైట్స్ ఇప్పటికే అమ్ముడైపోయాయి. దీని ద్వారానే సినిమాకి టేబుల్ ప్రాఫిట్ వచ్చినట్లు తెలుస్తోంది. థీయాట్రికల్ బిజినెస్ పరంగా చూసుకుంటే 2.5 కోట్ల వేల్యూ ఉంటుందని భావిస్తున్నారు. అంటే దాదాపు 3 కోట్ల షేర్ రాబట్టాల్సి ఉంటుంది.

ఇదేమీ పెద్ద టార్గెట్ అయితే కాదు. ఏ మాత్రం పాజిటివ్ టాక్ సొంతం చేసుకున్న కూడా వీకెండ్ లోనే మూవీ బ్రేక్ ఈవెన్ టార్గెట్ అందుకుంటుంది. మే 3న సుహాస్ ప్రసన్నవదనంకి పోటీగా అల్లరి నరేష్ ఆ ఒక్కటి అడక్కు మూవీ రిలీజ్ అవుతోంది. హీరోల పరంగా తేడా ఉన్న రెండు కూడా కామెడీ టచ్ ఉన్న కథలే కావడంతో ప్రేక్షకులకి ఈ వారం కావాల్సినంత వినోదం దొరుకుతుందని సినీ విశ్లేషకులు భావిస్తున్నారు.