చైనాను అణు క్షిపణితో కెలికిన తైవాన్

మిత్రుల మధ్య పొరపాట్లు దొర్లితే సర్దుకుంటారు. కానీ.. ప్రత్యర్థుల మధ్య పొరపాట్లు కుదరవు. ఒకవేళ.. నిజంగానే పొరపాటు జరిగినా.. అందుకు ఎంతోకొంత మూల్యం చెల్లించక తప్పని పరిస్థితి. తాజాగా తైవాన్ అలాంటి తప్పే చేసింది. చైనా నుంచి విడిపోయిన ఈ బుల్లి దేశం మీద చైనా అజమాయిషీ చేయటం.. దీనికి తైవాన్ అభ్యంతరం వ్యక్తం చేయటం జరుగుతున్నదే. రెండు దేశాల మధ్య సంబంధాలు అంతంతమాత్రమే . అలాంటి పరిస్థితుల్లో తాజాగా తైవాన్ చేసిన చర్య ఇప్పుడు అంతర్జాతీయంగా పెద్ద సంచలనంగా మారింది.

తైవాన్ దేశ వైమానిక దళం జరిపిన క్షిపణి విధ్వంసక అణు క్షిపణి పొరపాటున చైనా మీదుగా వెళ్లింది. అయితే.. తైవాన్ దీన్ని కావాలని చేసింది కాదు. ఆ దేశ వైమానిక దళం చేసిన పొరపాటు ఇప్పుడు కొత్త ఉద్రిక్తతకు దారి తీసే అవకాశాన్ని ఇచ్చింది. ఇంతకీ ఈ భారీ తప్పు ఎలా జరిగిందన్న విషయాన్నిచూస్తే.. శుక్రవారం ఉదయం 8 గంటల ప్రాంతంలో 300 కిలోమీటర్ల లక్ష్యాన్ని చేధించే స్వదేశీ సియుంగ్ – ఫెండ్ 3 అనే అణుక్షిపణిని ప్రయోగించింది. సోయింగ్ నగర పరిధిలోని సముద్ర జలాల్లో ఉన్న నౌక ద్వారా పరీక్షలు జరపగా.. అది చైనా వైపు దూసుకెళ్లినట్లుగా తైవాన్ చెబుతోంది.

అయితే.. ఈ క్షిపణి చైనాలో భాగమైన పెంగూకు 75 కిలో మీటర్ల దూరంలో సముద్రంలో పడిపోయింది. జరిగిన తప్పును చైనా గుర్తించే లోపే.. తైవాన్ స్పందించింది. తమ వల్ల తప్పిదం జరిగిందని.. ఎలా జరిగిందన్న విషయంపై దర్యాప్తు కూడా ప్రారంభించినట్లుగా పేర్కొంది. ఈ ఘటనపై చైనా ఇంకా రియాక్ట్ కాలేదు.