కేసీఆర్ ప‌నితీరుకు ఇదో నిద‌ర్శ‌నం

సీఎన్‌ బీసీ బిజినెస్ టీవీ చానెల్ ప్రతిఏటా ఇచ్చే లీడర్ అవార్డుల్లో ఈసారి తెలంగాణ రాష్ట్రం మోస్ట్ ప్రామిసింగ్ స్టేట్ అవార్డుకు ఎంపికైంది. కేంద్ర ఆర్థిక మంత్రి అరుణ్‌ జైట్లీ చేతుల మీదుగా రాష్ట్ర ఐటీ మంత్రి కేటీఆర్ ఈ ఆవార్డును ఢిల్లీలో అందుకున్నారు. ఈ సంద‌ర్భంగా కేటీఆర్ మాట్లాడుతూ త‌న తండ్రి - తెలంగాణ ముఖ్యమంత్రి కేసీఆర్‌ ను పొగిడేశారు. సీఎం కేసీఆర్ పరిపాలనకు ఢిల్లీ వేదికగా దక్కిన గౌరవమని చెప్పారు.

అవార్డును అందుకున్న అనంతరం కేటీఆర్‌ మీడియాతో మాట్లాడుతూ - మోస్ట్ ప్రామిసింగ్ అవార్డును అందుకోవడం సంతోషంగా ఉందని అన్నారు. మోస్ట్ ప్రామిసింగ్ స్టేట్ అవార్డు అందుకోవడం మాత్రమే కాకుండా ఆ ప్రామిస్‌ లను అమలుచేసి గుర్తింపు సంపాదిస్తామని కేటీఆర్ ఈ సందర్భంగా చ‌మ‌త్క‌రించారు. కొత్తరాష్ట్రమే అయినా అనేక రాష్ట్రాల‌తో పోటీపడి అవార్డు అందుకోవడం సీఎం కేసీఆర్ పరిపాలనా దక్షతకు - పనితీరుకు నిదర్శనమని మంత్రి చెప్పారు. దేశంలోనే త్వరలో తెలంగాణ రాష్ట్రం నంబర్‌ వన్‌ గా ఆవిర్భవిస్తుందని ధీమా వ్యక్తం చేశారు. కొత్తగా ఏర్పడిన, అతి తక్కువ వయసు కలిగిన రాష్ట్రమే అయినప్పటికీ కేసీఆర్ నాయకత్వంలో రాష్ట్రం పురోగమిస్తున్నదనడానికి - అభివృద్ధి బాటలో ముందుకు పోతున్నదనడానికి ఈ అవార్డు నిదర్శనమని కేటీఆర్‌ చెప్పారు. ప్రజలకు అభివృద్ధి - సంక్షేమ ఫలాలను అందించడానికి సంక్షేమం - సాగునీరు - పరిశ్రమలు.. ఇలా పలురంగాల్లో నూతన పాలసీలు వచ్చాయని, ఇవే తెలంగాణ పురోగామి రాష్ట్రంగా తయారు కావడానికి దోహదం చేశాయని కేటీఆర్ చెప్పారు.