నిన్న ట్యాంకర్ డ్రైవర్.. నేడు మిస్టర్ ఆసియా!

కృషి ఉంటే మనుషులు ఋషులవుతారు అన్ని ఇప్పటికే చాలా మంది చాలా సందర్భాల్లో రుజువు చేశారు. ఇదే క్రమంలో ఒక ట్యాంకర్ డ్రైవర్ ఎంతో కష్టపడి బాడీ బిల్డింగ్ చేసి మిస్టర్ ఆసియా టైటిల్ సాదించాడు. ఎన్నో అభినందనలు అర్హుడైన ఈ మిస్టర్... కర్ణాటక రాజధాని బెంగళూరుకు చెందిన జి.బాలకృష్ణ. ఇతడు వృత్తిరీత్యా ట్యాంకర్‌ డ్రైవర్‌.

ఇటీవల ఫిలిప్పీన్స్‌లో జరిగిన ఐదో ఫిలి-ఏసియా బాడీబిల్డింగ్‌ ఛాంపియన్‌ షిప్‌ లో పాల్గొన్న బాలకృష్ణ ఈ మిస్టర్ ఆసియా టైటిల్‌ ను కైవసం చేసుకున్నాడు. స్థానికంగా... "బెంగళూరు ఆర్నాల్డ్‌" గా పేరు తెచ్చుకున్న బాలకృష్ణ చిన్నతనంలోనే తండ్రిని పోగొట్టుకున్నాడు. ఆయనకు తల్లి పర్వతమ్మ, సోదరుడు రాజేష్‌ లు ఈ విషయంలో అండగా నిలిచారు. బాలకృష్ణ గతంలో కూడా జర్మనీలో జరిగిన పోటీలో అండర్‌-24 కేటగిరిలో మిస్టర్‌ యూనివర్స్‌ గా - 2014లో ఏథెన్స్‌ లో జరిగిన పోటీల్లో అండర్‌ -24కేటగిరిలో మిస్టర్‌ వరల్డ్‌ గా ఎంపికయ్యాడు.

కాగా, 'మిస్టర్ ఆసియాగా ఎంపిక కావడం ఎంతో ఆనందంగా, మరెంతో గర్వంగా ఉంది. నాకు మద్దతుగా నిలిచిన ప్రతీ ఒక్కరికీ నా ధన్యవాదాలు" అంటూ బాలకృష్ణ స్పందించారు. ఈ స్థాయిలో తన బాడీ బిల్డప్ కావడానికి కోచ్ ల శిక్షణతో పాటుగా ప్రతీరోజూ 750 గ్రా. చికెన్ - 25 కోడిగుడ్లు - 300 గ్రా. రైస్ - 200 గ్రా. కాయగూరలు - అప్పుడప్పుడూ చేపలు - మరింత ప్రోటీన్స్ కోసం ప్రూట్ జ్యూస్ బాలకృష్ణ మెనూ ఐటంస్ అంట. బాలకృష్ణ ముంబైకి చెందిన సంగ్రామ్‌ చౌగ్లా - పంజాబ్‌ కు చెందిన మునిష్‌ కుమార్‌ లు వద్ద శిక్షణ తీసుకున్నాడు. ప్రస్తుతం బాలకృష్ణ జిమ్‌ ఇన్‌ స్ట్రక్టర్‌ గా - వాటర్‌ ట్యాంకర్‌ డ్రైవర్‌ గానూ విధులు నిర్వహిస్తున్నాడు.

Like Us on Facebook : https://www.facebook.com/Tupakidotcom/