ఈసారి ఐఫోన్ 7ప్లస్ పేలిపోయింది

ప్రతిష్ఠాత్మక కంపెనీలు విడుదల చేసే ఉత్పత్తులకు సంబందించి నాణ్యత.. భద్రతా ప్రమాణాల విషయంలో చాలా జాగ్రత్తలే తీసుకుంటాయి.అందుకు భిన్నంగా తాజాగా చోటు చేసుకుంటున్న పరిణామాలు ఇప్పుడు సంచలనంగా మారాయి. మొన్నటికి మొన్న ప్రఖ్యాత శాంసంగ్ కంపెనీ విడుదల చేసిన గెలాక్సీ నోట్ 7 ఫోన్లు పెద్ద ఎత్తున పేలిపోవటం తెలిసిందే. ఈ వ్యవహారం శాంసంగ్ కంపెనీ ఇమేజ్ ను భారీగా డ్యామేజ్ చేసింది. చివరకు ఆ ఫోన్ ను రీకాల్ చేయటమే కాదు.. ఆ ఫోన్ ను పలు విమానాశ్రయాల్లో అనుమతించమని తేల్చి చెప్పేశారు.

గెలాక్సీ నోట్ 7 పేలిపోతున్న వేళ.. యాపిల్ విడుదల చేసిన ఐఫోన్ 7 గిరాకీ పెరిగింది. శాంసంగ్ ఫోన్లను కొనాలనుకున్న వారికి ఐఫోన్ ప్రత్యామ్నాయంగా మారటం.. శాంసంగ్ ను బాధిస్తోంది. ఇదిలా ఉంటే.. తాజాగా యాపిల్ ఐఫోన్ 7 పేలిన ఉదంతం తెరపైకి వచ్చింది. ఐఫోన్ 7 ప్లస్ పేలిపోయిందన్న వార్త మార్కెట్ వర్గాల్లో తీవ్ర సంచలనంగా మారింది. ప్రపంచాన్ని ఏలే రెండు అతి పెద్ద దిగ్గజాల ప్రతిష్ఠాత్మక బ్రాండ్లు పేలిపోతున్న ఆరోపణలు రావటం.. ఈ రెండింటి పేర్లు ‘‘7’’ ఉండటం గమనార్హం.

తన నోట్ 7 పేలిపోతున్న విషయాన్ని శాంసంగ్ ఇప్పటికే ఒప్పుకోగా.. ఐఫోన్ 7 పేలుతున్న వైనాన్ని యాపిల్ సంస్థ ఇప్పటివరకూ కన్ఫర్మ్ చేయలేదు. తాజాగా వెలుగులోకి వచ్చిన ఐఫోన్ 7 పేలిపోయిన వైనంలోకి వెళితే.. ఒక వినియోగదారుడు ఐఫోన్ 7 ప్లస్ ను ఆర్డర్ చేయగా.. అది అతని చేతికి వచ్చింది. ప్యాక్ విప్పి చూసినంతనే.. ఆ ఫోన్ పేలిపోయి ఉండటాన్ని గుర్తించారు. ఫ్యాక్టరీ నుంచి డెలివరీ మధ్యలో ఫోన్ పేలిపోయి ఉంటుందా? అన్నది ఇప్పుడు ప్రశ్నగా మారింది. ఏమైనా ‘‘7’’ అంకె ఎలక్ట్రానిక్ దిగ్గజ కంపెనీలకు ఏ మాత్రం కలిసి వచ్చినట్లుగా లేదు.

Like Us on Facebook : https://www.facebook.com/Tupakidotcom/