అద్వానీ మాటలు.. శత్రువులకు అస్త్రాలయ్యాయి!

భారతీయ జనతా పార్టీ కి పునాదులు వేసిన నేతగా పేరున్న లాల్‌కృష్ణ అద్వానీ మాటలు ఇప్పుడు భారతీయ జనతా జార్టీ రాజకీయ శత్రువులకు వరప్రదంగా మారాయి. పార్టీలో తనకు ప్రాధాన్యత దక్కడం లేదనో లేక మరోరకమైన అసంతృప్తితోనో కానీ.. అద్వానీ ఈ మధ్య ఒకింత ఆసక్తికరమైన వ్యాఖ్యానాలు చేశారు. దేశంలో మళ్లీ ఎమెర్జెన్సీ రోజులు రావొచ్చని ఆయన అభిప్రాయపడ్డారు. ఈ మాటలు మోడీని ఉద్దేశించినవేనని.. మోడీ తీరును తప్పుపట్టేవేననే అభిప్రాయాలున్నాయి. ఈ నేపథ్యంలో ముందుగా అరవింద్‌ కేజ్రీవాల్‌ అద్వానీ వ్యాఖ్యానాలతో ఏకీభవించిన సంగతి తెలిసిందే.

మోడీ సర్కారు అంతా తాను అవ్వాలనుకొంటోందని.. ఢిల్లీ వేదికగా ఆ అజెండాను మోడీ అమలు పరుస్తున్నాడంటూ కేజ్రీవాల్‌ మీడియాకు ఎక్కాడు. ఈ విషయాన్ని వివరించడానికన్నట్టుగా అద్వానీతో సమావేశం కావడానికి కూడా ప్రయత్నించాడు కేజ్రీ.

మరి ఆ సంగతలా ఉంటే.. ఇప్పుడు భారతీయ జనతా పార్టీకి శత్రువు వరసయ్యే మరో ముఖ్యమంత్రి కూడా ఇప్పుడు ఈ అంశంపై పెదవి విప్పాడు. అద్వానీ మాటలతో ఈయన ఏకీభవించాడు. ఈ సారి బిహార్‌ ముఖ్యమంత్రి నితీస్‌కుమార్‌ వంతు వచ్చింది. ఈయన అద్వానీతో ఏకీభవించాడు. దేశంలో ఎమెర్జెన్సీ రోజులు వచ్చే అవకాశం ఉందన్న బీజేపీ సీనియర్‌ నేత మాటలతో తను ఏకీభవిస్తున్నానని నితీష్‌ అన్నాడు.

మోడీ ప్రభుత్వ తీరుపై ధ్వజమెత్తుతూ ఈ బిహారీ బాబు ఈ వ్యాఖ్యానాలు చేశాడు. మొత్తానికి అద్వానీ మాటలు ఈ విధంగా వీరందరికీ అస్త్రాలుగా ఉపయోగపడుతున్నట్టున్నాయి.