కొత్త అవతారంలో మహేష్ బావ

మహేష్ బాబుకి బావగా ఇండస్ట్రీలో అడుగుపెట్టాడు సుధీర్ బాబు. యంగ్ హీరోస్ లో తనకంటూ ప్రత్యేకమైన గుర్తింపు కూడా సంపాదించుకున్నాడు. ప్రేమకథా చిత్రం లాంటి బ్లాక్ బస్టర్ తర్వాత ఆ స్థాయి విజయం సాధించలేకపోయినా.. మంచి సినిమాలతో ఆకట్టుకుంటున్నాడు. రీసెంట్ గా శమంతక మణి అంటూ కుర్రాళ్ల మల్టీ స్టారర్ లో నటించాడు సుధీర్ బాబు.

ఈ యంగ్ హీరో ఇప్పుడు నిర్మాతగా మారబోతున్నాడని తెలుస్తోంది. తన కొత్త చిత్రానికి తనే నిర్మాతగా వ్యవహరించబోతున్నాడట. రీసెంట్ గానే ఈ చిత్రం షూటింగ్ ప్రారంభం కాగా.. రాజశేఖర్ నాయుడు ఈ మూవీ ద్వారా దర్శకుడిగా అరంగేట్రం చేయబోతున్నాడు. నిజానికి ఈ చిత్రాన్ని వేరే నిర్మాతతోనే తలపెట్టారట. అందుకు తగినట్లుగా ఏర్పాట్లు కూడా చేసుకున్నారట. కానీ చివరి నిమిషంలో ఆ నిర్మాత వెనక్కు తప్పుకోవడంతో.. ఈ మూవీని తనే నిర్మించాలని ఫిక్స్ అయిపోయాడట సుధీర్ బాబు.

మూవీ కంటెంట్.. సబ్జెక్ట్.. కొత్త దర్శకుడిపై ఉన్న నమ్మకంతో ఇటు హీరోగా చేస్తూనే అటు ప్రొడక్షన్ కూడా చేసేయాలని సుధీర్ బాబు నిర్ణయించుకున్నట్లు తెలుస్తోంది. ఇంకా టైటిల్ డిసైడ్ చేయని ఈ చిత్రంలో.. కన్నడ భామ నాభా నతేష్ హీరోయిన్ గా నటించనుంది. ఈ బ్యూటీ ఇప్పటికే రవిబాబు మూవీ అదుగో చిత్రంలో నటించి.. విడుదల కోసం వెయిట్ చేస్తోంది.