రాజమౌళీ.. కాచుకో అంటున్న సుదీప్

కన్నడ నాట సుదీప్ ఫాలోయింగ్ ఏంటో కొత్తగా చెప్పాల్సిన పని లేదు. హీరోగా, డైరెక్టర్ గా బ్లాక్ బస్టర్ హిట్లిచ్చి.. కన్నడ ఇండస్ట్రీ రేంజే మార్చేసిన హీరో అతను. ‘ఈగ’ సినిమాతో టాలీవుడ్ లోనూ మంచి ఫాలోయింగ్ తెచ్చుకున్న సుదీప్.. ఆ సినిమా తర్వాత దక్షిణాదిన అన్ని భాషల్లోనూ కీలక పాత్రలు చేస్తూ నటుడిగా తన ప్రత్యేకత నిలుపుకుంటున్నాడు. ‘బాహుబలి’లోనూ ఓ పాత్రలో తళుక్కుమన్న సుదీప్.. తమిళ ‘పులి’లోనూ ఓ కీలక పాత్ర చేశాడు. ఐతే వరుసగా రెండు భారీ బడ్జెట్ ఎపిక్ మూవీస్ లో నటించేసరికి.. తనే స్వయంగా ఓ జానపద చిత్రం చేయాలన్న ఆలోచన వచ్చింది సుదీప్ కి. ‘బాహుబలి’ తరహాలోనే దక్షిణాది పరిశ్రమలో ప్రత్యేకంగా నిలిచిపోయేలా ఈ చిత్రాన్ని రూపొందించడానికి సన్నాహాలు చేసుకుంటున్నాడతను.

ఈ సినిమాను ఒకేసారి ఐదు భాషల్లో తెరకెక్కించాలన్నది సుదీప్ ప్లాన్. ఓ విభిన్న కథాంశంతో ప్రస్తుతం స్క్రిప్టు వర్క్ చేస్తున్నాడు సుదీప్. బడ్జెట్ విషయంలో ఇప్పటికే ఓ పెద్ద సంస్థ నుంచి హామీ తీసుకున్నాడట. త్వరలోనే స్క్రిప్టు పూర్తి చేసి.. నటీనటుల ఎంపిక పనిలో పడబోతున్నాడు సుదీప్. ఈ సినిమా ద్వారా రాజమౌళితో పాటు దక్షిణాది డైరెక్టర్లందరికీ సవాలు విసరాలనే పట్టుదలతో ఉన్నాడు సుదీప్. ఇప్పటిదాకా సుదీప్ డైరెక్ట్ చేసిన సినిమాల్లో ఎక్కువగా రీమేకులే ఉన్నాయి. ఐతే ఇది సొంతంగా రాసుకుని తీయబోతున్న కథ. వన్స్ ఇన్ ఎ లైఫ్ టైమ్ తరహాలో ఈ సినిమాను తీర్చిదిద్ది.. తన పేరు శాండిల్ వుడ్ లో నిలిచిపోయేలా చేసుకోవాలని భావిస్తున్నాడు సుదీప్. త్వరలోనే ఈ సినిమాకు సంబంధించి పూర్తి వివరాలు వెల్లడిస్తానని అతనంటున్నాడు. అతడి ప్రయత్నం విజయవంతమవ్వాలని ఆశిద్దాం.