హ్యాండ్ లూమ్ మామ్స్ కు సామ్ ఇన్విటేషన్

టాలీవుడ్ బ్యూటీ సమంత.. సినిమాలతో మహా బిజీ. మరోవైపు బ్రాండ్ అండార్స్ మెంట్స్ కు సంబంధించిన పనులనూ చక్కబెట్టేస్తోంది. వీటన్నిటితో పాటు మరో రెండు నెలల్లో జరగనున్న తన పెళ్లి పనులనూ చూసుకోవాలి. ఇక ఈ భామకు ఛారిటీ పనులపై కూడా మక్కువ ఎక్కువే. ఇన్ని పనులు చేసేస్తూ కూడా.. చేనేత వస్త్రాలకు సంబంధించి.. తనను ప్రచారకర్తగా నియమించినందుకు.. ఆ బాధ్యతల విషయంలో కూడా ఏ మాత్రం లోటు రానివ్వడం లేదు.

Woven2017 అంటూ చేనేత వస్త్ర ప్రదర్శనకు సంబంధించిన కార్యక్రమాన్ని నిర్వహించనున్న సంగతి ఇప్పటికే చెప్పుకున్నాం. ఇప్పుడు ఆ ప్రోగ్రాంలో అందరినీ భాగస్వామ్యం చేయడంతో పాటు.. ప్రజల్లో హ్యాండ్ లూమ్స్ పై అవగాహన ప్లస్ మక్కువ పెంచేందుకు కొత్తగా ఓ కాంపిటీషన్ కూడా స్టార్ట్ చేసింది సమంత. ఈ కార్యక్రమంలో కామన్ పీపుల్ కూడా భాగం అయ్యే అవకాశం ఉంటుందన్న మాట. అయితే.. ఈ కార్యక్రమంలో పార్టిసిపేట్ చేయాలని అనుకునేవారు చేయాల్సినదల్లా సింపుల్ పనే. ఆయా వ్యక్తులు తమ అమ్మ చేనేత వస్త్రాలలో ఉన్న ఫోటోను పోస్ట్ చేయాలి. అలాగే #ReviveHandloom.. #Woven2017 అంటూ హ్యాష్ ట్యాగ్స్ కూడా పెట్టాల్సి ఉంటుంది.

ఇందుకోసం తన తల్లి నినెట్టి ప్రభు ఫోటోను కూడా పోస్ట్ చేసింది సమంత. ఇలా పోస్ట్ చేసిన వారి నుంచి 5 బెస్ట్ లుక్స్ ను తనే స్వయంగా ఎంపిక చేస్తుందట. వీరు ఆగస్ట్ 7న జరగనున్న ఉవెన్2017 లో పాల్గొనే అవకాశం కల్పిస్తామని చెప్పింది శామ్.