రాధిక కూతురితో క్రికెటర్ పెళ్లి సందడి!

తెలుగు ఇండస్ట్రీలో ఎనభైవ దశకంలో అగ్ర హీరోయిన్లలో ఒకరిగా రాధిక తెలుగు ప్రేక్షకులకు సుపరిచితమే. మెగాస్టార్ తో జంటగా అత్యధిక సినిమాల్లో నటించిన రాధిక.. తర్వాత తమిళ ఇండస్ట్రీలో స్థిరపడ్డారు. అనంతరం బుల్లి తెర సీరియల్స్ తీస్తూ - నటిస్తూ - తమిళ హీరో శరత్ కుమార్ ను వివాహం చేసుకున్నారు. అయితే తాజాగా రాధికా శరత్‌ కుమార్ కూతురు రయానే - మిథున్ ల వివాహ వేడుక చెన్నైలోని మహాబలిపురంలో జరిగింది. క్రికెటర్ అభిమన్యు మిథున్‌ తో రయాన్ కు జరిగిన ఈ వివాహ వేడుకకు తెలుగు - తమిళ - కన్నడ చిత్ర పరిశ్రమకు చెందిన సినీ ప్రముఖులు హాజరై నూతన వధూవరులను ఆశీర్వదించారు.

ఈ కార్యక్రమానికి తమిళనాడు ముఖ్యమంత్రి జయలలిత - ఆమె స్నేహితురాలు శశికళ హాజరై కొత్త దంపతులను ఆశీర్వదించారు. నిర్మాత ఏఎం శరవణన్‌ - దర్శకులు శంకర్‌ - భారతిరాజా - కస్తూరిరాజా - బాలాజీ మోహన్‌ హాజరయ్యారు. ఇక దంపతులుగా సుహాసిని- మణిరత్నం - రాంకి- నిరోషా - భాగ్యరాజ్‌- పూర్ణిమ - సూర్య- జ్యోతిక దంపతులు హాజరై సందడి చేశారు.

చిరంజీవితో పాటూ ప్రభు - సత్యరాజ్‌ - చియాన్ విక్రం - విజయ్‌ - శివకార్తికేయన్‌ - పునీత్‌ రాజ్‌కుమార్‌ - హీరోయిన్స్ మీనా - రాధ - అంబిక - అర్చన - ఎడిటర్‌ మోహన్‌ - లిరిసిస్ట్ వైరముత్తు తదితరులు ఈ కార్యక్రమానికి హాజరైన వారిలో ఉన్నారు.

కాగా, ఇంగ్లాండ్ లోని లిట్స్ యూనివర్శిటీలో క్రీడారంగం విభాగంలో మాస్టర్స్ డిగ్రీ చేసిన రెయాన్.. ప్రస్తుతం రాడాన్ సంస్థకు సహాయ నిర్వాహకురాలిగా వ్యవహరిస్తోంది. క్రికెటర్ మిథున్‌ ఐపీఎల్‌ ఆడటంతోపాటూ భారత జట్టు తరపున 4 టెస్టులు, 5 వన్డేలు ఆడాడు.