విడుదలకు నెల ముందే సెన్సార్

ఇంకో వారం రోజుల్లో సినిమా విడుదల అనగా.. అప్పుడెళ్లి సెన్సార్ తంతు ముగిస్తుంటారు నిర్మాతలు. ఐతే నారా రోహిత్ కొత్త సినిమా ‘కథలో రాజకుమారి’ విషయంలో మాత్రం నిర్మాతలు మరీ త్వరపడిపోయారు. విడుదలకు నెల రోజులుండగానే సెన్సార్ పని ముగించేశారు. ఈ చిత్రం ఆగస్టు 25న విడుదల కానున్నట్లు మొన్న నారా రోహిత్ పుట్టిన రోజు సందర్భంగా ప్రకటించిన సంగతి తెలిసిందే. ఈ ప్రకటన చేసిన మరుసటి రోజే ‘కథలో రాజకుమారి’ సెన్సార్ అవగొట్టేయడం విశేషం. సెన్సార్ బోర్డు ఈ చిత్రానికి కట్స్ ఏమీ లేకుండా ‘క్లీన్ యు’ సర్టిఫికెట్ ఇవ్వడం విశేషం. అంటే ఈ చిత్రం క్లీన్ ఫ్యామిలీ ఎంటర్టైనర్ అన్నమాట.

టైటిల్ లోగో లాంచ్ దగ్గర్నుంచి ‘కథలో రాజకుమారి’ ప్రేక్షకుల్లో ఆసక్తి రేకెత్తిస్తోంది. నారా రోహిత్ ఫస్ట్ లుక్.. ఆ తర్వాత వచ్చిన టీజర్.. ట్రైలర్ అన్నీ కూడా ఆకట్టుకున్నాయి. సినిమా మీద పాజిటివ్ ఫీల్ కలిగించాయి. ఈ చిత్రంతో మహేష్ సూరపనేని అనే కొత్త దర్శకుడు పరిచయం కాబోతున్నాడు. ఈ సినిమా ఇప్పటికే ఫస్ట్ కాపీతో రెడీగా ఉన్నప్పటికీ మంచి టైమింగ్ కోసం చూసి.. ఆగస్టు 25కు ఫిక్సయ్యారు. రోహిత్ సరసన ‘చుట్టాలబ్బాయి’ ఫేమ్ నమిత ప్రమోద్ నటిస్తున్న ఈ చిత్రంలో నాగశౌర్య.. నందిత ప్రత్యేక పాత్రలు పోషిస్తున్నారు. లెజెండరీ మ్యూజిక్ డైరెక్టర్ ఇళయరాజాతో పాటు ‘కృష్ణగాడి వీర ప్రేమగాథ’తో మంచి గుర్తింపు సంపాదించిన విశాల్ చంద్రశేఖర్ ఈ చిత్రానికి సంగీతాన్నందిస్తున్నారు. ‘అప్పట్లో ఒకడుండేవాడు’ సినిమాను నిర్మించిన కృష్ణ విజయ్.. ప్రశాంతిలతో పాటు సౌందర్య ఈ చిత్రాన్ని నిర్మిస్తున్నారు.