ట్రైలర్ టాక్: నర్సింగ్ హోంలో నవ్వుల్ నవ్వుల్

చడీచప్పుడు లేకుండా షూటింగ్ చేసుకుని సడెన్ గా వార్తల్లోకి వచ్చింది ‘నందిని నర్సింగ్ హోం’ సినిమా. సీనియర్ నటుడు నరేష్ కొడుకు నవీన్ విజయ్ కృష్ణ కథానాయకుడిగా పరిచయమవుతున్న సినిమా ఇది. నిత్య, శ్రావ్య కథానాయికలుగా నటించిన ఈ సినిమాను కొత్త దర్శకుడు పీవీ గిరి రూపొందించాడు. రాధాకిషోర్.. భిక్షమయ్య నిర్మించారు. ఈ సినిమా ఆడియోను సూపర్ స్టార్ మహేష్ బాబు రిలీజ్ చేశాడు. ఈ సందర్భంగా థియేట్రికల్ ట్రైలర్ కూడా లాంచ్ అయింది.

ఇది నందిని నర్సింగ్ హోం చుట్టూ కథ కాబట్టే ఈ సినిమాకు ఆ పేరు పెట్టారు. ఈ నర్సింగ్ హోంలో హీరో డాక్టర్ వేషం వేసుకుని వస్తాడు. అక్కడ పేషెంట్ల జీవితాలతో ఆడుకుంటూ ఉంటాడు. అతడి అసిస్టెంట్ అయిన షకలక శంకర్ కూడా జాదూనే. వీరి బాధితుడిగా వెన్నెల కిషోర్ కనిపిస్తున్నాడు. ఈ ముగ్గురి కాంబినేషన్లో వచ్చే సన్నివేశాలు సినిమాకు హైలైట్ అయ్యేలా కనిపిస్తున్నాయి. ట్రైలర్లో వీరి మధ్య సన్నివేశాలు చూస్తుంటేనే హిలేరియస్ అనిపిస్తున్నాయి.

ముందు కామెడీతో మొదలుపెట్టి.. ఆ తర్వాత రొమాంటిక్ ట్రాక్ ఎక్కింది ట్రైలర్. ఇద్దరు హీరోయిన్లతో హీరో రొమాన్స్ చూపించి.. ఆ తర్వాత ట్విస్టిచ్చారు. హీరో హీరోయిన్ ట్రాప్ లో పడి ఇబ్బంది పడేలా చూపించారు. ద్వితీయార్ధం కొంచెం సీరియస్ గా సాగేలా కనిపిస్తోంది. మొత్తంగా ట్రైలర్ అయితే ఆసక్తికరంగానే అనిపిస్తోంది. మరి సినిమా ఎలాంటి ఫీలింగిస్తుందో చూడాలి. అక్టోబర్లోనే ఈ చిత్రం ప్రేక్షకుల ముందుకు రానుంది.



Like Us on Facebook : https://www.facebook.com/Tupakidotcom/