వేడి పుట్టిస్తున్న మంచు ల‌క్ష్మి కామెంట్స్‌

మంచు ల‌క్ష్మి త‌న తండ్రి మోహ‌న్‌ బాబులాగే డేరింగ్ అండ్ డాషింగ్‌. ఎవ్వ‌రికీ భ‌య‌ప‌డ‌రు. త‌న మ‌న‌సుకు ఏద‌నిపిస్తే అది నిర్భ‌యంగా చెప్పేస్తుంటారు. అయితే మోహ‌న్‌ బాబు కూతురైన త‌న‌ని ఎవ‌రు మోసం చేస్తార్లే అని చాలా మంది భావిస్తుంటార‌ని - కానీ తాను చాలామంది చేతుల్లో మోస‌పోయాన‌ని ఆమె చేసిన కామెంట్లు ఇప్పుడు ఆస‌క్తిని రేకెత్తిస్తున్నాయి. ల‌క్ష్మీని మోసం చేసింది ఎవ‌రా అని అంతా ఆరా తీసే ప‌నిలో ఉన్నారిప్పుడు. అయితే తాను ఎంతగా మోస‌పోయినా - సినిమాల‌తో ఎంత డ‌బ్బు పోగొట్టుకొన్నా ఇప్ప‌టికీ ఎవ్వ‌రికీ పైసా కూడా ఇవ్వ‌కుండా ఆప‌లేద‌ని ఆమె చెప్పుకొచ్చారు.

ఇటీవ‌లే ఆమె న‌టించి నిర్మించిన వైఫ్ ఆఫ్‌ రామ్ ప్రేక్ష‌కుల ముందుకొచ్చింది. ఆ సినిమా ప్ర‌మోష‌న్ల‌లో భాగంగా ఇస్తున్న ఇంట‌ర్వ్యూల్లో మంచు ల‌క్ష్మి సంచ‌ల‌న‌మైన కామెంట్లు చేస్తోంది. మొన్న‌టికి మొన్న తెలుగులో ఆద‌రించ‌డం లేదని - అందుకే తాను త‌మిళంలోకి షిఫ్ట్ అవుతాన‌ని ప్ర‌క‌టించింది. అంత‌టితో ఆగ‌కుండా తాజాగా త‌న‌కి డ‌బ్బు ఎగ్గొట్టిన ఓ నిర్మాత బండారాన్ని బ‌య‌ట‌పెట్టింది. ``నేను తీసిన `గుండెల్లో గోదారి` సినిమాకి సంబందించిన అప్పులు ఇప్ప‌టికీ క‌ట్టుకుంటూ ఉన్నా. కానీ ఒక నిర్మాత మాత్ర త‌న‌కి ఇవ్వాల్సి 23 ల‌క్ష‌లు ఎగ్గొట్టి వేరొక‌రి పేర్ల‌తో సినిమాలు తీస్తున్నాడు`` అని ఓ ఇంట‌ర్వ్యూలో కామెంట్ చేశారు ల‌క్ష్మి. ఆ కామెంట్ ఇండ‌స్ట్రీలో మ‌రోమారు చ‌ర్చ‌ను లేవ‌నెత్తుతోంది. బెల్లంకొండ‌పైనే ల‌క్ష్మి ఆరోప‌ణ‌లు చేసింద‌ని కొంత‌మంది గుస‌గుస‌లాడుకుంటున్నారు. `ఊ కొడ‌తారా ఉలిక్కి ప‌డ‌తారా` కోసం వేసిన సెట్లో బెల్లంకొండ ర‌భ‌స సినిమా షూటింగ్ జ‌రిపాడు. దాని రెంట్‌ కి సంబంధించి ల‌క్ష్మికి డ‌బ్బు రావ‌ల్సి ఉంద‌ట‌. దాని గురించి అప్ప‌ట్లో వివాదం కూడా న‌డిచింది. ఆ త‌ర్వాత సెటిల్ అయింద‌నుకొన్నారు కానీ... ల‌క్ష్మి మ‌రోమారు త‌న‌కి డ‌బ్బు ఎగ్గొట్టారనే మాట‌ని చెప్ప‌డంతో అంద‌రూ అప్ప‌ట్లో జ‌రిగిన ఆ ఇన్సిడెంట్‌ ని గుర్తు చేసుకుంటున్నారు.