మేము సైతం అంటున్న మంచు లక్ష్మి

మంచు వారసురాలు లక్ష్మీ ప్రసన్న సినిమాల్లోనే కాకుండా.. టెలివిజన్ రంగంలో కూడా సత్తా చాటుతోంది. సినిమాలు తీయడం నటించడంతో పాటే.. టీవీల్లో టాక్ షోలతోనూ సక్సెస్ ఫుల్ పర్సన్ గా పేరు తెచ్చుకుంది. ప్రేమతో మీ లక్ష్మితో స్టార్ట్ చేసి - లక్కుంటే లక్ష్మి - దూసుకెళ్తా - బూమ్ బూమ్ వంటి కార్యక్రమాలను దిగ్విజయంగా డీల్ చేసిన అనుభవం ఉంది.

అలాగే ఈమెకు సామాజిక సేవపై కూడా మక్కువ ఎక్కువ. చెన్నై వరదల సయమంలో మేము సైతం అంటూ ఓ కేంపెయిన్ ను టాలీవుడ్ తరఫున నడపడంలో.. లక్ష్మీ మంచు కీలక పాత్ర పోషించింది. ఇదే కాకుండా కొన్ని సామాజిక సేవా కార్యక్రమాల్లోనూ పాల్గొన్న అనుభవం, మంచితనం ఆమె సొంతం. అందుకే ఓ ఎంటర్ టెయిన్ మెంట్ ఛానల్.. మేముసైతం అంటూ ప్రారంభించబోతున్న కార్యక్రమానికి తొలి ఆప్షన్ గా ఈమెనే ఎంచుకుంది. 'మీతో ఓ సూపర్బ్ న్యూస్ పంచుకుంటున్నందుకు హ్యాపీగా ఉంది. త్వరలో మరో కార్యక్రమానికి హోస్ట్ గా వ్యవహరించనున్నాను. మేము సైతం అంటూ జెమినీ టీవీ నిర్వహించనున్న ప్రోగ్రాం త్వరలో ప్రారంభమవుతుంది' అంటూ ట్వీట్ చేసింది లక్ష్మీ మంచు.

ఈ కార్యక్రమం సోషల్ హెల్ప్ అనే కాన్సెప్ట్ పై ఉండనుందని సమాచారం. అయితే ఇప్పటివరకూ ప్రోమోస్ లాంటివి చేయకపోవడానికి కారణం హోస్ట్ ని ఎంపిక చేయకపోవడమే. ఇప్పుడు మంచు వారసురాలిని ఈ బాధ్యతలకు ఎంపిక చేయడంతో.. త్వరలో ఈ ప్రోగ్రాంకి సంబంధించిన డీటైల్స్ అనౌన్స్ చేయనున్నారు.