క్రిష్ కథలు ఎలా పుట్టాయంటే..

తన చుట్టూ ఉన్న మనుషులు.. పరిస్థితుల నుంచి కథలు తీసుకుని సినిమాలు తీస్తుంటాడు దర్శకుడు క్రిష్. ఇలాంటి దర్శకులు మన ఇండస్ట్రీలో చాలా అరుదు. ‘గౌతమీపుత్ర శాతకర్ణి’తో భారీ విజయాన్నందుకుని.. ప్రశంసల వర్షంలో తడిసి ముద్దవుతున్న క్రిష్.. ఈ సినిమాతో పాటు తాను ఇప్పటిదాకా తీసిన అన్ని చిత్రాల వెనుక ఉన్న నేపథ్యాన్ని ఒక ఇంటర్వ్యూలో పంచుకున్నాడు. క్రిష్ కథల్లో చాలామందికి తెలియని కోణాల్ని అతడి మాటల్లోనే తెలుసుకుందాం పదండి.

‘‘గమ్యం సినిమా కథ రాయడానికి అప్పటి ప్రభుత్వం-నక్సల్స్ మధ్య చర్చలు నాకు స్ఫూర్తినిచ్చాయి. అదే సమయంలో కోటప్ప కొండ తిరనాళ్లలో జరిగే అసభ్యమైన పనుల గురించి కూడా ఈ సినిమాలో ప్రస్తావించాను. ఆ సినిమా ఎంత సక్సెస్ అవుతుంది అన్నది ఆలోచించలేదు. అప్పటికి ఆ కథ చెప్పాలని బలంగా కోరుకున్నాను. సినిమా తీశాను. ఆ తర్వాత ‘వేదం’ కథకు ముంబయి దాడులు కథా వస్తువు అయ్యాయి. ఉగ్రవాదులు ఆసుపత్రి మీద దాడి చేసిన ఘటన నేపథ్యంలో ఈ కథ రాసుకున్నాను. మన చుట్టూ ఉండే మనుషుల్లోంచి పాత్రలు తీసుకున్నాను. ఇక ‘కృష్ణం వందే జగద్గురుం’ సినిమాకు సురభి నాటకాలే స్ఫూర్తి. అప్పట్లో ముఖ్యమంత్రిగా ఉన్న రాజశేఖర్ రెడ్డి గారు సురభి వాళ్లకు స్థలం కేటాయించారు. అది చిన్న వార్తే కావచ్చు. దాన్నుంచే నేను ఈ కథ రాసుకున్నాను. కంచె సినిమాకు రాష్ట్ర విభజన నేపథ్యమైంది. తెలుగు రాష్ట్రాలు విడిపోయినా.. మనుషులుగా కలిసుండాలనే నేపథ్యంలో ఈ సినిమా తీశాను. దీనికి రెండో ప్రపంచ యుద్ధ పరిస్థితుల్ని ముడిపెట్టాను. ఇక ‘గౌతమీపుత్ర శాతకర్ణి’కి నాంది పడింది 2011-12 ప్రాంతంలో. కోటి లింగాల దగ్గర నాణేల ప్రదర్శన జరిగినపుడు శాతవాహనుల కథ గురించి తెలుసుకుని ఈ సినిమా తీయాలన్న నిర్ణయానికి వచ్చాను’’ అని క్రిష్ తెలిపాడు.

Like Us on Facebook : https://www.facebook.com/Tupakidotcom/