ట్రైలర్ టాక్‌ః ఏంటది ఫిదా ట్రైలరా?

ఈరోజు మల్టీప్లెక్సులలో ''డిజె దువ్వాడ జగన్నాథమ్'' సినిమాను చూసినోళ్ళకు ఇంటర్వెల్ లో భారీ షాకే తగిలింది. ఎందుకంటే ఊహించని విధంగా అక్కడ వరుణ్‌ తేజ్ చేసిన ''ఫిదా'' సినిమా ట్రైలర్ రిలీజైంది. కనీసం చిన్ని ఇంటిమేషన్ లేకుండా సడన్ గా ఈ ట్రైలర్ రిలీజ్ చేసేపాటికి అందరూ ఖంగారుపడ్డారు. అసలు ఏ సినిమా ట్రైలర్ చూస్తున్నారో తెలిసేలోపు ట్రైలర్ అయిపోయింది.

లవర్ బాయ్ లా ఉండే ఒక అమెరికా రిటర్న్ కుర్రాడు.. పక్కా తెలంగాణా పోరికి పడిపోతాడు. ఇటు వరుణ్‌ తేజ్ తన కూల్ లుక్స్ తో అటు సాయి పల్లవి తన ప్రెజన్స్ తో బాగానే ఆకట్టుకున్నారు. కాకపోతే కథ మాత్రం అందరికీ తెలిసిన కథలాగే ఉంది. సాధారణంగా శేఖర్‌ కమ్ముల సినిమాల్లో కథలు అలాగే ఉంటాయిలే. ఇకపోతే ఇక్కడ కూడా మనోడు హీరోయిన్ నడుమును ఉండీలేనట్లు చూపిస్తూ.. అప్పట్లో కమిలిని ముఖర్జీతో చేయించిన మ్యాజిక్ ఇప్పుడు సాయిపల్లవితో కూడా చేయించేశాడు. ట్రైలరంతా ఆమె నడుం షాట్లతోనే నిండిపోయింది అంటే అతిశయోక్తికాదులే. ఇక ఫైనల్ గా వీరిద్దరూ ప్రేమలో పడి ఏమైపోతారు అనేదే సినిమా. మనోడు ప్రపోజ్ చేసినా ఆమె ఒప్పుకోలేదు అనే ట్విస్టుతో ట్రైలర్ ఎండైంది.

అయితే ఒక్క విషయం ఏంటంటే.. అసలు ట్రైలర్ రిలీజ్ చేస్తున్నాం అని చెప్పి రిలీజ్ చేసుంటే.. జనాలు చాలా ఆసక్తిగా చూసేవారు. ఏదో సడన్ గా ఒక వీడియో వచ్చేసి.. ఒక నిమిషం పాటు చూశాక.. ''ఓహ్ ఇది ఫిదా ట్రైలరా??'' అనే షాకులోనే చాలామంది ట్రైలర్ లోని స్వీట్నెస్ మిస్సయిపోతారు. అది మాత్రం గ్యారంటీ.



Like Us on Facebook : https://www.facebook.com/Tupakidotcom/