మహేష్ బ్రాండ్ తో కొత్త హీరో

సినిమా కుటుంబాల నుంచి వారసుల పరంపర అన్ని బాషల్లోను ఉండేదే. టాలీవుడ్ దానికి అతీతం కాదు. ఒక్కో ఫ్యామిలీ నుంచి కనీసం ముగ్గురు హీరోలున్న నేపధ్యంలో ఈ మధ్య రాజకీయ నాయకుల వారసులు కూడా సినిమా వైపు యు టర్న్ తీసుకోవడం ఆసక్తి రేపుతోంది. ఆ మధ్య మంత్రి గంటా శ్రీనివాసరావు అబ్బాయి గంటా రవి హీరోగా జయదేవ్ అనే మూవీ తీస్తే అది డిజాస్టర్ అయ్యింది. దీంతో మరో సినిమా చేసే ఉద్దేశాన్ని అతను వాయిదా వేసుకున్నాడు. అంతకు ముందు కర్ణాటక మాజీ సిఎం కుమారస్వామి వారసుడు నిఖిల్ గౌడను జాగ్వార్ సినిమాతో లాంచ్ చేసారు. అదే రిజల్ట్ వచ్చింది. నిఖిల్ గౌడ కన్నడలో కంటిన్యూ అవుతున్నాడు కాని ఇంకా భారీ సక్సెస్ ఏది అందుకోలేదు. ఇప్పుడు మరో పొలిటీషియన్ అబ్బాయి ఎంట్రీకి రంగం సిద్ధం అవుతోంది.

ప్రిన్స్ మహేష్ బాబు మేనల్లుడు, గల్లా జయదేవ్ అబ్బాయి అశోక్ గల్లా ఎంట్రీకి రంగం సిద్ధం అవుతోంది. దిల్ రాజు దీనికి నిర్మాతగా వ్యవహరించబోతున్నారు. బెక్కెం వేణుగోపాల్ సహా నిర్మాత. ఈయన గతంలో సినిమా చూపిస్తా మావా, నేను నాన్న బాయ్ ఫ్రెండ్స్ నిర్మించారు.రచయిత హరి దీంతో డైరెక్టర్ గా లాంచ్ కాబోతున్నాడు. ప్రీ ప్రొడక్షన్ వర్క్ దాదాపు పూర్తైన ఈ సినిమాను త్వరలోనే స్టార్ట్ చేయబోతున్నారు.

అశోక్ గల్లా వ్యక్తిగత ఆసక్తి మీదనే ఈ సినిమా తీస్తున్నట్టు వార్త. కుర్రాడు మంచి గ్రేస్, గ్లామర్ తో ఉండటంతో నటన మరియు ఇతర కీలక అంశాలకు సంబంధించిన శిక్షణ పూర్తి చేసారట. ఎలాగైనా నటుడిగా పేరు తెచ్చుకుని హీరోగా సెటిల్ కావాలనేది అశోక్ ప్లాన్ లా ఉందని తెలిసింది. మహేష్ మేనల్లుడు అనే బ్రాండ్ కొంతవరకే ఉపయోగపడుతుంది అనే విషయం దృష్టిలో పెట్టుకుని అశోక్ ని సోలోగా ఫోకస్ చేసేలా స్క్రిప్ట్ సిద్ధం చేసారని టాక్. హీరొయిన్, టెక్నికల్ టీం తదితర వివరాలు ఇంకా ఫైనలైజ్ కావలసి ఉంది.