‘సైరా’లో ఆ నటుడు కూడా?

మెగాస్టార్ చిరంజీవి కథానాయకుడిగా తెరకెక్కబోయే ‘సైరా నరసింహారెడ్డి’లో భారీ తారాగణమే ఉండబోతోందని ఇంతకుముందే వెల్లడైంది. బాలీవుడ్ మెగాస్టార్ అమితాబ్ బచ్చన్‌ తో పాటు కన్నడ స్టార్ సుదీప్.. టాలీవుడ్ సీనియర్ హీరో జగపతిబాబు.. సౌత్ ఇండియన్ లేడీ సూపర్ స్టార్ నయనతార ఈ సినిమాలో కీలక పాత్రలు పోషించబోతున్నట్లు కొన్ని నెలల కిందటే చిత్ర బృందం వెల్లడించింది.

ఈ సినిమాలో మరో టాలీవుడ్ సీనియర్ నటుడు బ్రహ్మాజీకి కూడా కీలక పాత్ర దక్కినట్లు సమాచారం. ఈ సినిమాలో నటించే మిగతా నటీనటులతో పోలిస్తే బ్రహ్మాజీ స్థాయి తక్కువే కానీ.. అతడి పాత్ర మాత్రం సినిమాలో కీలకంగా ఉంటుందట. ఈ పాత్ర గురించి చెప్పగానే బ్రహ్మాజీ మరో ఆలోచన లేకుండా సినిమా చేయడానికి అంగీకరించాడట. ‘సింధూరం’ తర్వాత బ్రహ్మాజీ కెరీర్లో ఇది అతి పెద్ద అవకాశం అని భావిస్తున్నారు.

‘సైరా నరసింహారెడ్డి’ రెగ్యులర్ షూటింగ్ కోసం సన్నాహాలు పూర్తి కావస్తున్నాయి. డిసెంబరు 6న ఈ చిత్ర తొలి షెడ్యూల్ మొదలవుతుందంటున్నారు. ఇటీవలే చిరుపై టెస్ట్ షూట్ చేయగా.. అది బాగా వచ్చినట్లు చెబుతున్నారు. రామ్ చరణ్ నిర్మాతగా సురేందర్ రెడ్డి దర్శకత్వంలో రూ.200 కోట్ల భారీ బడ్జెట్‌తో ఈ చిత్రం తెరకెక్కనుంది. రత్నవేలు ఛాయాగ్రహణం అందించే ఈ చిత్రానికి ఎ.ఆర్.రెహమాన్ సంగీత దర్శకుడు.