బెల్లంకొండ బాబు ప్రయోగానికి రెడీ

బెల్లంకొండ సాయి శ్రీనివాస్ ఇప్పటివరకూ కమర్షియల్ చిత్రాలతో సత్తా చాటేందుకు బాగానే ప్రయత్నించాడు. అనుభవం ఉన్న దర్శకులతోనే సినిమాలు చేస్తూ.. ఆడియన్స్ ను అలరించేందుకు ట్రై చేశాడు. అయితే.. ఇవి కేవలం మాస్ ఆడియన్స్ ను మాత్రమే ఈ యంగ్ హీరోకు దగ్గర చేశాయి.

ఇతర వర్గాలకు చెందిన ప్రేక్షకులను ఆకట్టుకునేందుకు.. కొత్తదనం ఉన్న సినిమాలను అందించక తప్పదనే సంగతి ఈ హీరోకు అర్దమయినట్లు ఉంది. అందుకే ఇప్పుడు ఓ వెరైటీ కాన్సెప్టుతో ప్రేక్షకుల ముందుకు రానున్నాడట. శ్రీనివాస్ అనే కొత్త దర్శకుడికి అవకాశం ఇచ్చాడు బెల్లంకొండ హీరో. ఇది ఇద్దరు హీరోయిన్లు ఉండే లవ్ స్టోరీ అయినా.. యాక్షన్ థ్రిల్లర్ జోనర్ లో సాగుతుందని తెలుస్తుంది. స్టోరీతో పాటు ఆ కథను దర్శకుడు నెరేట్ చేసిన తీరు.. ముఖ్యంగా స్క్రీన్ ప్లేను దర్శకుడు రూపొందించిన విధానం విపరీతంగా నచ్చేశాయని.. అందుకే ఈ చిత్రాన్ని వెంటనే స్టార్ట్ చేసేందుకు ఒప్పుకున్నాడని చెబుతున్నారు.

వంశధార క్రియేషన్స్ బ్యానర్ పై నవీన్ సొంటినేని ఈ చిత్రాన్ని నిర్మించనున్నారు. రీసెంట్ గా రామానాయుడు స్టూడియోస్ లో.. ఈ చిత్ర ప్రారంభోత్సవ పూజా కార్యక్రమాలను గ్రాండ్ గా నిర్వహించారు. ఇప్పటివరకూ మాస్ సినిమాలతో అలరించిన బెల్లంకొండ శ్రీనివాస్ కెరీర్ లో.. ఇదో వైవిధ్యభరితమైన చిత్రంగా నిలుస్తుందనే టాక్ వినిపిస్తోంది.