అఫీషియల్: రెండో బాహుబలి 2.47 గంటలు

Fri Apr 21 2017 17:30:42 GMT+0530 (IST)

‘బాహుబలి’ ఒక సినిమాగా తీస్తే నాలుగు గంటల కంటే ఎక్కువ నిడివి వస్తోందని.. అందుకే రెండు భాగాలు చేస్తున్నామని అన్నాడు రాజమౌళి. ఒక భాగమే రెండున్నర గంటలకు పైగా నిడివి ఉన్న నేపథ్యంలో రెండో భాగం నిడివి మరీ ఎక్కువేమీ ఉండదనుకున్నారంతా. ఆ మధ్య ‘బాహుబలి: ది కంక్లూజన్’ లెంగ్త్.. 2 గంటలకు కొంచెం ఎక్కువ మాత్రమే అన్న ప్రచారం జరిగింది. అది ప్రేక్షకులకు అంతగా రుచించలేదు. తొలి భాగానికి దీటుగా రెండో భాగం లెంగ్త్ ఉంటే బాగుంటుందని అభిప్రాయపడ్డారు. ఈ విషయంలో జక్కన్న అండ్ కో ప్రేక్షకుల్నినిరాశకు గురి చేయట్లేదు. బాహుబలి-2 నిడివి తొలి భాగం కంటే ఎక్కువ ఉండబోతోంది.

కొన్ని రోజులుగా ప్రచారం జరుగుతున్నట్లే ‘ది కంక్లూజన్’ లెంగ్త్ 2 గంటల 47 నిమిషాలు ఉండబోతోందని అధికారికంగా వెల్లడైంది. బాహుబలి-2 సెన్సార్ డీటైల్స్ ను నిర్మాతలు మీడియాతో పంచుకున్నారు. ఈ చిత్రానికి యు/ఎ సర్టిఫికెట్ ఇచ్చిన సంగతి కూడా ధ్రువీకరించారు. సరిగ్గా ఇంకో వారం రోజుల్లో ‘బాహుబలి: ది కంక్లూజన్’ ప్రేక్షకుల ముందుకు రాబోతోంది. ప్రపంచవ్యాప్తంగా దాదాపు 10 వేల థియేటర్లలో ఈ సినిమా రిలీజయ్యే అవకాశాలు కనిపిస్తున్నాయి. ఇండియాలో మాత్రమే స్క్రీన్ల సంఖ్య 7-8 వేల మధ్య ఉండే అవకాశముంది. ముందు అనుకున్న దాని కంటే థియేటర్ల సంఖ్య క్రమక్రమంగా పెరిగిపోతోంది. అమెరికా-కెనడాల వరకే ఈ చిత్రాన్ని 1000కి పైగా థియేటర్లలో రిలీజ్ చేయబోతుండటం విశేషం.

Like Us on Facebook : https://www.facebook.com/Tupakidotcom/