వివేకం : కొత్త జాడీలో పాత పచ్చడి

అంతన్నాడే ఇంతన్నాడే గంగరాజు ముంత మామిడి తోపు అన్నాడే గంగరాజు అంటూ గత కొన్ని రోజులుగా తమిళంలో తెగ హడావుడి చేసిన అజిత్ లేటెస్ మూవీ వివేగం తెలుగులో వివేకం పేరిటి విడుదలైంది. అనేక సార్లు వాయిదా పడిన ఈ సినిమాకు తమిళంలో వచ్చిన హైప్ తెలుగులో లేదనే చెప్పాలి. కనీసం విడుదల తేదీ కూడా చాలా మందికి తెలియని పరిస్థితి. తమిళంలో అజిత్ కి ఉన్న క్రేజ్ రీత్య ఈ సినిమాకు అక్కడ భారీగానే బిజినెస్ జరిగినప్పటికి, బయ్యర్స్ మాత్రం టెన్షన్ పడుతున్నారనే టాక్ వినిపిస్తుంది. ఇక తెలుగులో ఈ సినిమాకి ఆశించినంత స్థాయిలో బిజినెస్ జరగలేదని టాక్.

అజిత్ నుంచి గతంలో వచ్చిన తెలుగు సినిమాలు వరుసగా ఫ్లాప్ అవ్వడమే దీనికి మెయిన్ రీజన్ అని తెలుస్తుంది. ఇక ఈ సినిమాను భారీ బడ్జెట్ తో తెరకిక్కించామని చెబుతున్న దర్శకనిర్మాతలు ఇటీవలే విడుదల చేసిన ట్రైలర్ తో వారు చెప్పింది తప్పని నిరూపించుకున్నారు. దర్శకనిర్మాతలు చెబుతున్నంత రేంజ్ లో ఈ సినిమాకు ఖర్చు అవ్వలేదని ట్రేడ్ వర్గాలు చెబుతున్నాయి. భారీ యాక్షన్ సన్నివేశాలకు పెట్టింది పేరుగా ఉన్న డైరెక్టర్ శివ ఈ సినిమాకు కూడా అదే ఫార్ములాని అప్లై చేశాడు. ఇక్కడ తప్పితే మరెక్కడ ఈ సినిమాలో డబ్బు ఖర్చు పెట్టే అవకాశం లేదని అంటున్నారు. ఇక ఈ సినిమాల్లో కనిపించే గ్రాఫిక్స్ ఎప్పుడో పాత సినిమాల్లో వాడిన టెక్నాలజీ మాదిరిగా అనిపిస్తుంది. అదే ఈ సినిమాకు పెద్ద మైనస్ అని తెలిసింది. దీనికి తోడు సినిమాకు కూడా ఇప్పుడు డిజాస్టర్ టాక్ రావడంతో ఓపెనింగ్స్ వర్క్ అవుట్ అయినా, మూడురోజులు తరువాత థియేటర్ల ఖాళీ అయిపోతాయని బయ్యర్లు భయపడుతున్నారని ఫిల్మ్ నగర్ లో వార్తలు వస్తున్నాయి. అయితే ఆ ఓపెనింగ్స్ కూడా తమిళంలోనే ఎక్కువుగా ఉంటాయి, తెలుగులో అజిత్ కి పెద్దగా మార్కెట్ లేదు. మరి వీరందరినీ అజిత్ ఏ రీతిన కాపాడుతాడో చూడాలి.